Urte berria abian dugu eta gure proiektuek aurrera diraute. Seinale ona da hori, baina, lanean jarraitu behar dugu, honek ez baitu etenik.
Ekintzaile izatean, deskantsu gutxi daude. Oporretan deskonektatu dezakegu, batzuetan, egoera alde izanez gero. Baina, bestela, ideia berriak pentsatzen, eskaintzen duguna berrikusten, gure harremanak lantzen igaro behar izaten dugu urtea. 2024a emaitza onekin amaituta ere, 2025a ideia berriekin, lan komertziala eginez eta zerbitzu gehiago eskainiz hasi beharko dugu, ziurrenik.
Hori, baina, nola egin genezake bidean gure osasun mentala galdu gabe? Guri ondo antolatzeak asko laguntzen digu. Hau da, urte hasieran egutegiaren aurrean jarri eta jada lotuta ditugun lanak, bilerak, proiektuak non eta nola ditugun ikusi eta zer landu beharko genukeen erabakitzea. Batzuetan lan komertziala da bultzatu behar dena urte hasieran, beste batzuetan zerbitzu berriak pentsatzea komeni izaten da edota gure formakuntza sakontzeko moduak topatzea, besteak beste.
Lan egiteko modua
Partekatutako egutegia dugu eta hor joaten gara egunean eguneko lanak txertatzen, etorkizunera begirako zitak, ideiak… era horretan, ez ditugu lanak ahazten eta antolaketa errazten digu. Etorkizunera begirako panorama bistadizo batean ikus dezakegu eta unean uneko egoera aztertzeko ere balio digu. Antolatzeko egutegia eta eguneroko lanarekin batera, aurrera egitea lortu dugu urtez urte. Aplikazio desberdinak erabili izan ditugu urteetan zehar, baina, outlook-eko egutegia bera da efizienteena egin zaiguna azkenean. Bertan, emailarekin batera dugu egutegia eta hori izaten da gure antolaketarako tresna garrantzitsuena. Baliabide bakarretik, antolaketako bi tresna nagusiak ditugu bertan. Zuk, zer erabiltzen duzu?
Kontuan izan behar dugu dena ez dagoela gure esku, baina, gure esku dagoena egiten badugu, ahal duguna egiten ari gara, ez dela gutxi. Gerora, hor daude merkatuaren gorabeherak, konpetentzia, elkarlanak, etab. gure kontroletik at daudenak eta gure arrakasta edota galeretan eragiten dutenak. Baina, kanpo eragin horiek hor daudela jakinik, barne eraginak ahalik eta ondoen antolatu eta lantzea da gure esku dagoena. Beraz, horri heltzea gomendatzen dizuegu.
Zuen kasuan, zein baliabide dira lagungarri zaizkizuenak lana antolatu eta efizientzia ahal den neurrian bermatzeko? Egutegia erabiltzen duzue agenda moduan zuek ere? Beste bideren bat duzue, zuen lan egiteko moduagatik efizienteagoa dena zuentzat? Partekatzea aberasgarria da, beraz, guk egin dugun moduan, zuei ere zuen baliabideak partekatzea eskertuko dizuegu, denon artean ikas dezagun eta lagun gaitezen.
Eutsi 2025ari eta sorpresa onez betea izan dezazuela hasi berri den urtea!