“Aprende a promocionar tu trabajo” liburua Austin Kleonek idatzitakoa da.
Erraz irakurtzen den liburua da eta ideiak martxan jartzeko aproposa. Kontuan izan behar da berak bere eremutik idatzitakoa dela -eremu artistikoa-, beraz, zure lan esparruaren araberakoa izango dela liburuari atera ahal izango diozun probetxua.
Errealitate anglosaxoi batean du abiapuntua eta garapena liburu honek, baina guretzat ere baliagarria izan daiteke ideiak hartu eta geureganatzeko.
Liburuaren azalpen laburra
Oinarrizkoak diren irizpideak eskaintzen ditu, baina, askotan ahaztu egiten zaizkigunak. Liburu honetako esaldietako bat honakoa da: “Para que alguien te encuentre, tienes que ser encontrable”, hau da, norbaitek zurekin/zure enpresarekin topo egiteko, topatzeko erraza izan behar zara. Logikoa dirudien esaldi bat den arren, askotan ez da premisa hori betetzen. Beraz, zure proiektua gauzatzeko orduan ondo pentsatu non zabaldu nahi duzun enpresa, zein medio erabiliko dituzun (sare sozialak, flyerrak, publizitatea komunikabideetan, etab.), zure bezero eta jarraitzaileak non topatuko dituzun zu ere bertan zabaltzeko, beti izen eta logotipo bera erabiltzea, etab. Bezero posibleei bilaketa lana erraztu behar diezu zugana era errazean jo dezaten, bestela, beste norbait aurreratuko zaizu.
Sareetan zure enpresa/proiektuaren berri ematen duzunean, zure lanaz gain, partekatu zure gustukoak diren erreferenteak, eguneroko lanerako erabiltzen dituzun baliabide/lanabesak, etab. Zure proiektuaz hitz egitea garrantzitsua da, baina berauk aurrera egitea baimentzen dizuten ideia/baliabide/lankide, etab.ez jardutea ere.
Liburu honetako beste esaldi baliagarrietako bat honakoa da: “Tu trabajo no habla por sí sólo, hay que explicarlo. A la gente le gustan las historias”. Askotan gure lan eremuko jergan azaltzen ditugu proiektuak eta ez gara ohartzen eremu horretan ez dabilen norbait baldin bada berau irakurri edo entzuten ari dena, ez duela ari garenaz hitz erdi bat ere ulertuko. Era sinple eta errazean azaldu gauzak, une honetan aurrean duzun bezero/jarraitzaile profil horren lekuan jarri eta xehetu azalpenak, ulergarri egin.
“El verdadero riesgo es no cambiar” esaldi esanguratsua da ekintzaileontzako. Une oro gure egoera aldatu egiten da; gure aste batek, soldatapean lan egiten duen pertsona baten hilabeteak duen intentsitatea izan dezake. Hori dela eta, lorpenak ospatzea garrantzitsua da, egindako aurrerapenez jabetu eta aldaketa konstante hori baloratzeko.
Aldaketa konstantean
Eta amaitzeko, liburuan topa dezakezun beste esaldi bat: “Quien no se sienta avergonzado de la persona que era hace un año, probablemente no esté aprendiendo lo suficiente”. Duela urtebete zinen pertsonaz lotsatzea beharbada ez da egokia, hau da, lotsatu baino beste hitz bat egokiagoa izan daiteke; baina esaldiaren zentzua orokorrean ulertuta egokia deritzogu post hau amaitzeko. Hau da, aldaketa konstantean bizitzea aberasgarria da, ikasten jarraitzera gonbidatzen gaitu eta gure ekintzailetza prozesuan lagungarri izango da gure aldaketarako joera hori. Duela urtebeteko “zu” ezertan aldatu ez bada, beharbada kezkagarria da une oro mugimenduan dagoen mundu honetan. Ikas dezagun egunero zerbait berria, erronkak jar ditzagun eta aurrera egitera bultzatu geure buruak.
Aldaketa, erronkak, lorpenak eta zabalpena.