Bakarrik sentituko gara maiz gure ibilbidean, baina, badaude baliagarriak izan daitezken euskarri eta baliabideak.
Post honen bidez baliabide horietako batzuk partekatuko dizkizuegu, zuek ere gauza bera egingo duzuelakoan… denak elkar aberastuz joan gaitezen 😉
Ekiten dugunean, gure proiektuan buru-belarri gabiltzanean, pozik eta ilusioz lan egin arren, ohikoa izaten da bakarrik sentitzea. Sarea osatzea oso garrantzitsua den arren, askotan denbora eta ordutegi desberdinek zailtzen baitute gure sektore edo egoera antzekoan egon daitezkeen ekintzaileekin harremandu eta elkartzea.
Baina, eskura ditugu, bide bakarti bezain aberasgarri honetan lagun izan ditzakegun baliabideak.
Podkastak:
- Podkastak argitaratzen dituzten plataforma ugari daude: ivoox, podimo, podium podcast, spotify, irratiek ere izaten dituzte podkastak, etab. Gure podkasteko kanala hementxe 😉
- Gai ugari dira berauetan lantzen direnak, beraz, gure proiektu edota aisialdiarekin lotutako bilaketa egin genezake eta gai horien inguruko podkastak topatu: feminismoa, ekintzailetza, ekonomia, historia, komedia, elkarrizketak (orokorrean), teknologia berriak, etab.
- Podkastak entzuteak lan egiten dugun bitartean, besteen ahotsak entzunez ikasteko balioko digu eta konpainian sentitzeko aldi berean.
Liburuak:
- Entzutea, baino, irakurtzea nahiago badugu eta gure proiektuak horretarako tarte eta indarrak uzten badizkigu, liburu ugari topa ditzakegu liburutegietan edota eros ditzakegu liburu-dendetan.
- Liburuen bidez, gure sektorean sakondu genezake eta gure zerbitzuetan hobetu genezake, ideia berriekin freskatu, besteen esperientzietatik ikasi, etab.
Bideo-deiak:
- Bideo-deiak baliagarriak izan daitezke blokeo momentu batean, edota zalantzak argitu nahi baditugu, etab. Sare fisikoa mantentzea zaila egiten bazaigu lehen aipatu ditugun arrazoiengatik, sare birtuala manten genezake gure sektore edota inguruan dabiltzan beste ekintzaileekin.
- Noizean behin tartetxo bat har genezake bideo-deien bidez elkarren berri jakin, ideiak partekatu, zalantzak argitu eta harremana sendotzeko.
Ikus dezakezuen bezala baliabide hauek gure ingurunean eskura ditugun baliabideak dira, doakoak dira eta gure lanean sakontzeko edo beronetaz deskonektatzeko balioko digutenak dira, gainera. Lanaz nekatuta gaudela eta komediazko podkast bat entzun nahi dugula burua beste zerbaitean izateko? Hortxe dugu aukera. Lanean gustura gabiltzala eta gehiago sakondu nahi dugula alor batean? Topa dezagun podkast edo liburu bat nahi dugun horretaz gehiago ikasi ahal izateko! 😉
Hauen bidez asko ikas eta partekatu daitekeela iruditzen zaigu eta ekintzailetzaren egunerokoa arintzen lagun diezaguketela.
Zuek zein baliabide erabiltzen dituzue egunerokoan bidea errazteko?