Ekintzailetzan egunerokoa sorpresaz beteriko bidea da. Gutxitan jakiten dugu astea edota hilabetea nola joango den, nahiz eta gure lanen antolaketa bikaina izan.
Guk gure aurreikuspenak egin ditzakegu, gure lanak antolatu, datak jarri, etab. Baina, betetzeko aukera izaten al dugu? Batzuetan beharbada bai, baina, gure kasuan behintzat, gehienetan ez dira lanak guk espero ditugun denbora eta moduetan egikaritzen. Horrek egunerokoan moldatzeko gaitasuna lantzea dakarkigu, eta, ondorioz, une oro oztopoak gainditzea. Hor dago ekintzaileen eguneroko lanaren gakoa: nola aurre egiten diegu ezustekoei? Irrifar batekin? Haserre?
Azken finean, gure esku dagoena ondo egiten badugu, ezinezkoa zaigu gainontzekoena ere egitea. Beraz, askotan zaila den arren, saia gaitezen animoa eta umorea mantentzen, horrek lagunduko baitigu egunerokoa hobeto eramaten. Bai gure hobe beharrez eta baita proiektuaren onurarako ere.
Eta oztopoei, nola aurre egin?
Oztopoak gainditu behar izaten dira ekintzailetzan, guk nahi genukeena baino maiztasun handiagoarekin. Baina, hala da eta onartzea baino modu hoberik ez dago aurrera egin ahal izateko, ezta?
Ekin genuenean, ez genuen uste hainbeste oztopo eta hain maiz gainditu beharko genituenik egunerokoan, urtez urte. Baina hala izaten ari da. Oztopoak gainditzeko gure modua, erronka formatua ematea izan da. Hau da, geure buruetan oztopo bezala baino, erronka bezala irudikatzea une horretan aurre egin beharrekoa. Tontakeria dirudien arren, guri behintzat lagungarria izan zaigu. Negatiboan ulertu beharrean gertatzen ari dena, erronka moduan, lortu beharreko zerbait bezala ulertu izan dugunean, gure ikuspegia ere aldatu egin da eta beste jarrera batekin aurre egin izan diogu oztopo/erronkari.
Ez da erraza eta ez dugu beti lortu izan. Azken finean, gu geu ere ez baikaude egunero indar berarekin. Batzuetan dena erraz ikusten da, norbera ere indartsu sentitzen delako; eta beste batzuetan, aldiz, oztopo txikiena ere handi bilakatzen da. Denoi gertatzen zaigu hori, bai lanean, baita bizitza pertsonalean ere. Gogoratu, bide hau luzea da eta gorabeherak izatea ohikoa da; garrantzitsuena, pixkanaka bada ere, aurrera egitea da.
Eutsi gogor urte hasierari eta irrifar egin egunerokoari! 😉