Liburuak baliabide egokiak dira kontzeptu, ideia eta borroka modu berriak/desberdinak ezagutzeko orduan. “El club de la lucha feminista. Manual de supervivencia en el trabajo para mujeres” liburua ezagutzen al duzu? Hala bada, baliagarria izan zaizu?
Gaurkoan “El Club de la Lucha Feminista, manual de supervivencia en el trabajo para mujeres” liburuaz jardungo gara. Jessica Bennett idazleak, bere esperientzia propiotik abiatuta eta umorea erabiliz emakumeok lan munduan jasan behar izaten ditugun jarrera matxistak zeintzuk diren aztertu eta horiei nola aurre egin diezaiekegun azaltzen digu.
El Club de la Lucha Feminista
Nola hitz egiten dugun, zertan garen desberdinak gizonekiko, zergatik, nola aldatu hori gure helburuak lortu ahal izateko; soldata igoera bat eskatzeko pauso egokiak izan daitezkenak; mansplaininga gailendu eta gure ahotsak entzunarazteko moduak; amatasuna eta beste hainbat gai lantzen ditu Bennettek liburu honetan.
Berau irakurtzea oso baliagarria da jarrera matxista horietaz ohartzeko, asko hain barneratuta ditugu ez garela konturatu ere egiten (ez gizonak ez emakumeak ere, behin baino gehiagotan aipatu izan dugun bezala, jendarte matxista batean bizi garelako eta zaila delako matxismoa guztiz gainetik kentzea); egoerak umorearekin hartu eta umorearekin erantzuteko modu inteligenteak aipatzen ditu. Guztiz gomendagarria da.
Horretaz gain, kontuan izan behar dugu Estatu Batuetako errealitatean oinarrituta dagoela eta guri egoera batzuk urruti xamar geratzen zaizkigula. Hemen egoera ekonomikoa, lan filosofia eta bestelako gaiak desberdin bizi ditugulako, baina aipatzen duen gehiena gugan ere praktikan jar dezakegu.
Goikaldean ikus ditzakezun irudiak liburuko orrialde batzuk dira, posturak era grafikoan adierazten ditu horietako batean, boterea irabazi edo galtzeko modua dela adieraziz, besteak beste.
Esan bezala, modu errazean eta umore askorekin idatzitako liburua da. Lan munduan aurrera egiteko “laguntza” txiki bat da, beti ere kontuan izanik aldaketa norberarengan dagoela.
Zuk ba al duzu modu honetako libururik erreferentziatzat? Lagungarri egin zaizun idatzirik? Gustu handiz irakurriko ditugu zure proposamenak 😉