Ekiten dugunean, herri bat, auzo bat, bulego, lokal ala etxe bat aukeratzen dugu. Garbi izaten dugu zertan ekin nahi dugun, baina, garrantzia bera du, berez, ekingo dugun ingurunearen azterketa egiteak.
Hala ere, ekintzaile askok ez du ingurunearen azterketa egiten ekin aurretik, ezta ondoren ere. Behin ekin ondoren, daukagun ingurunean nola murgildu gintezken gehiago jakiteko balioko liguke. Baina, ekin aurretik, auzo, herri ala kale bat aukeratzen lagun gaitzake.
Segidan aurkezten dizkizuegu hainbat kontzeptu, galdera eta iturri, zuen ingurunea aztertzen has zaitezten 😉
Ingurunearen azterketa egiteko lau pauso:
- Herriaren oinarrizko datuak: Biztanle kopurua, sexuaren arabera, adinaren arabera, auzoetan bizi diren pertsonak, hitz egiten diren hizkuntza nagusiak… Datu hauek lortzeko, Eustat-en webguneko “Nire udalerria datuetan” atalean herri baten izena txertatua agertzen dira.
- Norberaren jarduera abiatzeko kokapen mota: jardueraren arabera, komeniko da, bulego bat irekitzea, lokal bat, pabilioi bat ala etxetik hastea. Zentzu honetan, garbi izan behar dugu, ikusten dena dela askotan saltzen dena: eta beraz, erdigunean bulego ala lokal bat irekitzeak ikusgarritasuna ekarriko duela. Baina, era berean, etxetik aritzea baino kostu gehiago sortuko ditu. Beraz, norberaren diru-sarreren arabera joan behar dugu ibilbide hau trazatzen. Txikitik has gaitezke, bezeroak egiten, eta bezero ugari fidelizatuta ditugula ikustean (hileko kostuen zati handi bat estaltzen laguntzera iristean), urrats bat eman herriko erdigunean lokal bat irekitzeko.
- Sare sozialen erabileraren azterketa: gure bezero potentzialak sareetan ibiltzen dira? Ala kalean gehiago? Sareetan ibiltzen badira, eurek erabili ohi dituzten plataformak ezagutu beharko genituzke. Instagram, Twitter… erabiltzen ikas dezakegu, eta bide horietatik zabaldu gure jardueraren berriak. Hala ere, neurria hartu beharra dago. Hasi sare sozial batekin. Denbora asko eskaini behar baitzaio sare sozialetan edukien argitaratze eta plangintzari.
- Herriko kale-ibileren azterketa: pertsona asko internetetik kanpo ibiltzen da, eta kalean erostea gustatzen zaio, eskuetan hartuz ala bertatik bertara ikusiz erosi nahi duen hori. Hori horrela, kale-ekintzak ere egin behar genituzke. Adibidez, eskuorriak sortu eta banatu jendartean, edota, gure bulegoaren/lokalaren kanpoaldean albiste eta promozioen berri emateko euskarriak jarri. Erakusleihoak ere mezu asko transmititzen ditu, eta hori lantzeak bezero berriak erakartzea suposa dezake.
Espero dugu lau puntu hauetan agertzen ditugun galderek zer hausnartu ekartzea, izan ere, horretan baitako etorkizunera begirako bidea eraikitzeko gakoa. Hausnartu orain, eta hartu erabakiak. Ongi pentsatuta eta urratsak poliki-poliki emanez, ez zara gastu handietan sartuko. Zure ingurunea ezagutzeak on egingo dizu, eta bezero potentzialekin bat egitea ekarriko dizu.
Beti diogun moduan, bidea ez da erraza, baina, batzuetan gelditu egin behar da pentsatzeko. Dagoeneko ekin baduzu, gelditu orain pentsatzeko. Aurrera nola egin ikusteko; errentagarritasun gehiago nola lortu neurtzeko; gastuak nola murriztu erabakitzeko.
Ondo izan!